Иманғали Тасмағамбетов қызметінен кетті
Федерацияның жаңа президенті Қазақстанда гольфты дамытумен және насихаттаумен айналысуға ниетті
"Қазақстан гольф федерациясының" жаңа президенті болып Иманғали Тасмағамбетовтің орнына кәсіпкер Берік Қаниев тағайындалды, деп хабарлайды Almaty-akshamy.kz El.kz-ке сілтеме жасап.
Берік Қаниев – қазақстандық кәсіпкер және қоғам қайраткері. Ол "Lancaster Group Kazakhstan" компаниясы директорлар кеңесінің төрағасы, сондай-ақ білім беру, спорт және экология саласындағы бірқатар әлеуметтік жобалардың құрылтайшысы. Олардың қатарында "Jas Qyran" футбол орталығы, Республикалық физика-математика мектебі, Физмат Эндаумент қоры және "Air Vision" экофонды бар. Сондай-ақ, меценат ретінде "IQanat" және "Аналар Үйі" жобаларын қаржыландырады.
Федерацияның жаңа президенті Қазақстанда гольфты дамытумен және насихаттаумен айналысуға ниетті. Сонымен қатар, осы олимпиадалық спорт түріне жастарды тарту үшін балалар мен жасөспірімдер гольфін дамытуды жоспарлап отыр.
Айта кетейік, Иманғали Тасмағамбетов Қазақстан гольф федерациясының президенті болып былтырғы жылдың мамыр айында сайланған. Ол бұған дейінгі басшысы Нұртай Әбіқаевты алмастырған.
Елімізде гольф федерациясы 2006 жылы құрылған. Содан бері спорттың осы түрінен астанада гольф клубы ашылып, «Ambassador'sCup» турнирі өткізіле бастаған. Оған Қазақстанның саяси қайраткерлері, шетелдік бизнес-қауымдастықтың және елімізде тіркелген дипломатиялық корпустың өкілдері қатысқан.
