Еңбекмині проактивті қызметтерді жеңілдетеді
Еңбекмині проактивті қызметтерді жеңілдетеді
ҚР Еңбек және халықты әлеуметтік қорғау министрлігі проактивті форматта, яғни автоматты түрде, азаматтың қатысуынсыз көрсетілетін мемлекеттік қызметтерді көрсету процесіне реинжиниринг жүргізеді, деп хабарлады Almaty-akshamy.kz. ҚР Еңбек және халықты әлеуметтік қорғау министрлігінің таратқан хабарына сілтеме жасап.
«Өткен жылдың қорытындысы бойынша, проактивті форматта мемлекеттік қызметтерді көрсетумен төмен қамту атап өтілді. Бұрын SMS-диалог кезінде көрсетілетін қызметті алушыларға екі SMS-хабарламаға жауап беру қажет болатын, біріншісі қызметті алуға келісім болған. Мемлекеттік қызметтерді проактивті түрде алған адамдардың санын арттыру үшін көрсетілетін қызметті алушымен диалог кезінде SMS санын екіден біреуге дейін қысқарту туралы шешім қабылданды. Бір SMS-хабарламадағы сауалға жауап беру арқылы қызмет көрсету банкін таңдауды растау алынады, бұл проактив арқылы мемлекеттік қызметті көрсетуге автоматты келісім болып табылады», – деді ҚР Еңбек және халықты әлеуметтік қорғау вице-министрі Ербол Оспанов.
Ағымдағы жылғы 1 маусымнан бастап жеңілдетілген форматта «Бала тууға байланысты және бір жасқа дейінгі бала күтімі бойынша жәрдемақылар тағайындау» қызметі көрсетіледі. Нәтижесінде проактивті түрде сәтті көрсетілген қызметтер саны 10%-дан 37%-ға дейін артты. Жыл соңына дейін бұл көрсеткішті 50%-ға дейін жеткізу жоспарланып отыр.
Бұдан басқа, автоматты түрде ақпарат алмасу мақсатында екінші деңгейдегі банктермен және «Қазпошта» АҚ-мен интеграциялық өзара іс-қимыл есебінен онлайн режимде азаматтар үшін бар банк шотын растау немесе ашу бойынша процесті оңтайландыру жүргізілуде.
Сондай-ақ, жыл соңына дейін бірқатар проактивті қызметтерді оңтайландыру жоспарлануда:
– жұмысынан айырылған жағдайда төленетін әлеуметтік төлемді тағайындау;
– асыраушысынан айырылған жағдайда төленетін әлеуметтік төлемді тағайындау;
– асыраушысынан айырылу бойынша мемлекеттік әлеуметтік жәрдемақыны тағайындау;
– еңбек ету қабілетінен айырылған жағдайда берілетін әлеуметтік төлемді тағайындау;
– мүгедектігі бойынша мемлекеттік әлеуметтік жәрдемақы тағайындау;
– «Алтын алқа», «Күміс алқа» алқаларымен марапатталған немесе бұрын «Батыр Ана» атағын алған, «Ана даңқы» ордендерімен марапатталған көп балалы аналарға мемлекеттік жәрдемақы тағайындау.
