Бостандық ауданында мектептердегі орын тапшылығын азайту мәселесі қолға алынған
Оқу жылы басталғанша ауданда мектеп оқушылары үшін жаңа корпус пайдалануға беріледі.
Бұл туралы қала әкімі Ерболат Досаев Бостандық ауданының тұрғындарымен өткен кездесуде айтты, деп хабарлайды Almaty-akshamy.kz.
Мектептерде орын тапшылығын азайту үшін маусым айында №146 лицей мен №191 мектепке 300 орындық екі қосымша корпус салынып бітті.
1 қыркүйекке дейін №125 мектептің 275 орындық жаңа корпусын пайдалануға беру жоспарлануда.
Бұдан басқа, қала әкімдігі «Әділет» колледжі орналасқан 600 орындық №94 мектептің бір бөлігін сатып алды. Жыл соңына дейін балалар толыққанды мектепте оқуға кіріседі.
Сондай-ақ, келесі жаңа оқу жылының басында №9 мектеп-интернатының асханасы мен 120 орындық жаңа корпусын аяқтау жоспарланған болатын. Құрылыс материалдары мен қызметтердің қымбаттауына байланысты шамамен 200 млн.теңгеге жобалау-сметалық құжаттамасына түзету енгізілуде. Қыркүйек айының басында сараптамадан өткеннен кейін қосымша қаражат бөлінеді. Осыған байланысты құрылыс-монтаждау жұмыстарын аяқтау мерзімі 2022 жылғы 30 қарашаға дейін ұзартылды.