Алматының Жетісу ауданын дамыту мектеп пен балабақшаны көбейтуді қажет етеді

Жетісу ауданының әкімі Гүлнар Көкебаева үш мектептің қосымша ғимараттарының құрылысын жеке өзі тексереді. Бұл жұмыстар белсенді жүргізіліп жатыр, бұл туралы ол Алматы қаласының Өңірлік коммуникациялар қызметінің брифингінде айтты, деп хабарлайды almaty-akshamy.kz

Оқушы орнының тапшылығын азайту үшін ауданда үш мектепте 800 орынға арналған қосымша құрылыс жұмыстары жүргізілуде.

«Құлагер ықшам ауданында №148 мектепте 300 орындық қосымша құрылыс аяқталды. Қазіргі уақытта мердігер ұйым объектіні тапсыру процесін жүргізуде», - деп бастады есебін Гүлнар Көкебаева. 

Сонымен қатар, биылғы маусымда мектептерге қосымша ғимараттар салу жұмыстары басталған болатын: 
– №103 мектепке қосымша 200 орын
– №112  мектепке қосымша 300 орын
 Аталған объектілер бойынша жұмысты аяқтау мерзімі – 2024 жылдың тамызы.

Г.Көкебаева аяқталған нысандар жайлы да есеп берді. Осы жылдың тамыз айында № 101 мектепке 312 орындық акт залының қосымша құрылысы аяқталды және биылғы қараша айының басында №80 мектепті сейсмикалық күшейтумен күрделі жөндеу аяқталды.

Сонымен қатар, ауданда «Мектеп автобусы» бағдарламасы жүзеге асырылуда, оның аясында 5 мектептің 1722 оқушысының жайлы автобустармен қатынауы қамтамасыз етілді.

Айнабұлақ шағын ауданының мемлекеттік балабақшаларында орын тапшылығын азайту мақсатында өткен жылдың мамыр айында қолданыстағы құрылысты сүру арқылы 160 орындық жаңа балабақшаның құрылыс жұмыстары басталды. Бүгінгі таңда балалар бақшасының құрылысы аяқталды және нысанды тапсыру жұмыстары жүргізіліп жатыр. 

Қорытындылай келе, аудан әкімі Алматы қаласын дамытудың 2025 жылға дейінгі бағдарламасы шеңберінде жыл соңына дейін Боткин көшесі, 16 үй мекенжайы бойынша жастар комунити-орталығын іске қосу жоспарланып отырғанын хабарлады.