Алматылықтар бүгін Зейнеп Ахметовамен кездеседі
Өтетін орны: «Алатау» дәстүрлі өнер театры
24 мамыр күні сағат 19:00-де ұлт жанашыры, жазушы, этнограф, Бауыржан Момышұлының келіні Зейнеп Ахметовамен кездесу өтеді, деп хабарлайды Almaty-akshamy.kz
Кездесуді «Адырна» ҰЭБ қоғамдық қоры ұйымдастырып отыр.
«Зейнеп апайымыз текті, қаһарман қазақтың келіні, Момышұлы әулетінің өкілі. Одан бөлек қазақы салт-дәстүрдің білгірі, жазушылығы да бар. Ол кісі Алматыда тұрса да, қаламызда бұрын-соңды осындай ауқымды шара өтпепті. Апаймен кездесулер көбіне тек аймақтарда өтіп келіпті. Байқасаңыздар, қазір жас буынға беретін тәрбиесі жоқ, жалаңаштанумен аты шыққан немесе дінді теріс насихаттап жүрген ағымның өкілдері, халықты алдап жүрген желідегі алаяқтармен кездесу өткізіліп жатады, солар жастарға ақыл айтып отырады. Олардың ел жинап, ақыл айтуға моральдық құқы жоқ. Ал Зейнеп апаймен кездесулер көбірек өткізіліп, ол кісінің кеңесін тыңдап, білгенін естуіміз керек, бұған мемлекеттік тұрғыдан қолдау болса дұрыс болар еді», - деді кештің ұйымдастырушысы Арман Серікұлы біздің тілшімізге.
