Алматыдағы «Бақытты отбасы» орталығында Ашық есік күні өтті

Аталған әлеуметтік орталыққа күніне жиырмадан аса адам келеді.

Алматыдағы «Бақытты отбасы» орталығында Ашық есік күні өтті. Алмалы ауданында орналасқан әлеуметтік мекемеде көп балалы аналар мен әлеуметтік аз қамтылған отбасыларға мемелекеттік қызметкерлер кеңес берді, деп хабарлайды Almaty-akshamy.kz Almaty.tv сілтеме жасап.

Арнайы ұйымдастырылған шараға прокуратура өкілдері мен тұрғын үй саясаты басқармасының мамандары қатысып, келушілердің көптеген сауалдарына жауап беріп, мәселені шешу жолдарын көрсеткен. 

«Келген аналардың АӘК-ке, қосымша жәрдемақыға, балалардың ыстық тамағына қатысты сауалдары көп. Сондықтан біз бүгін Ашық есік күнін ұйымдастырдық. Біз көп балалы аналар мен мұқтаж отбасылардың барынша дұрыс, шынайы ақпар алғанын қалаймыз», - деді Алмалы ауданы «Бақытты отбасы» орталығының директоры Іңкәр Жаңаәділқызы.

Аталған әлеуметтік орталыққа күніне жиырмадан аса адам келеді екен. Одан өзге, бұл жерде шаштараз, аспаз, тігінші секілді қоғамға керекті мамандықтарға үйретеді. Егер жақсы игеріп кетсе, жұмыс та тауып беруге болады дейді мамандар. «Бақытты отбасы» орталығы қоғамдағы өзекті мәселелерді оңтайлы шешіп, мұқтаж отбасылардың өмір сүру сапасын арттыруға бағытталған.  

«Қазір мен өзім секілді жағдайдағы аналарға кеңес беремін. Менің балам да ерекше күтімді қажет еді. Ал «Бақытты отбасы» орталығы бәріне үлгеруім үшін маған ыңғайлы жұмыс уақытын белгілеп берді», - деді әлеуметтік жұмыстар бойынша кеңесші Айдана Тәжібаева.