Алматыда жаңа қойылымның премьерасы өтті
Алматыда Наталия Сац атындағы балалар мен жасөспірімдерге арналған мемлекеттік академиялық театрында «Сац. Бір дайындықтың хроникасы» спектаклінің мерейтойлық премьерасы өтті.
Режиссер Елена Пьянованың қойылымы Халық артисі және еліміздегі алғашқы балаларға арналған театрдың құрылтайшысы Наталия Сацтың 120 жылдығына арналған, деп хабарлайды Almaty-akshamy.kz 24.kz-ке сілтеме жасап.
Спектакльде өнер иесінің қойылымға дайындығы сахналанды. Ол сонау 1945 жылдың 7 қарашасында Евгений Шварцтың «Қызыл телпек» әңгімесін көрерменге ұсынған еді. Премьераға Мәдениет және ақпарат министрі және басқа да отандық, шетелдік қонақтар келді. Театрдың кіреберісінде «Сац уақыты» атты фотокөрме ұйымдастырылды.
«Біз осы спектакль мен көрме арқылы Наталия Сацтың 120 жылдығын қорытындылаймыз. Ресейдің Театр музейі қолдау көрсетіп, көрменің көркін аша түсті. Олар Наталия Сацтің жеке заттары, құжаттары мен тың суреттерін алып келді. Біздің театр ашылып, алғашқы «Қызыл телпек» спектаклінде киген 2 костюмді де көрмеге шығардық», - дейді театрдың әдебиет-драматургия бөлімінің жетекшісі Татьяна Карамышева.
