Тұрмыстық зорлық-зомбылық жасағаны үшін қамалғандар 2 есе көбейген
Өткен жылы полиция тұрмыстық жанжал туралы 100 мыңға жуық хабарлама тіркеді.
Бұл туралы ІІМ Әкімшілік полиция комитеті төрағасының міндетін атқарушы Ренат Зулхаиров айтты, деп хабарлайды аlmaty-akshamy.kz.
«Өткен жылы Президенттің тапсырмасымен тұрмыстық зорлық-зомбылық үшін жауапкершілік күшейтілді. Қылмыстық және Әкімшілік кодекстерге түзетулер енгізілді. 2023 жылдың 1 шілдесінен бастап полиция өтініш беруден тұрмыстық құқық бұзушылықтарды тіркеудің анықтаушы сипатына көшті. Әкімшілік іс қозғалады. Соңғы құқықтық бағалауды сот береді. Жаңа заңнама аясында тұрмыстық жанжалдар туралы 50 мың өтініш қаралды. Материалдардың 64 пайыз бойынша әкімшілік іс жүргізілді. Әкімшілік қамауға алынған адамдардың саны 2 есеге артты. Сотта 27 мыңнан астам отбасы татуласты», - деді ол Орталық коммуникациялар қызметіндегі дөңгелек үстел барысында.
Ренат Зулхаировтың атап өтуінше, ІІМ зорлық-зомбылыққа ұшыраған отбасылармен алдын алу жұмысын жандандырды. Өткен жылы полицияда тұрмыстық жанжал туралы 100 мыңға жуық хабарлама тіркелген. Оның ішінде 15 мың тұрмыстық зорлық-зомбылық фактісін полиция қызметкерлері анықтады. Барлық тіркелген фактілер бойынша кінәлілер заңда көзделген жауапкершілікке тартылды.
«Әрбір отбасылық жанжалқой заңмен зорлық-зомбылық жасағаны үшін 5 тәуліктен бастап, өмір бойына бас бостандығынан айыруға дейін әкімшілік қамауға алу жауапкершілігі қарастырылғанын білуі керек. Өткен жылы 79 мыңнан астам құқық бұзушы әкімшілік, мыңға жуық азамат қылмыстық жауапкершілікке тартылды», - деді ІІМ өкілі.
