Каспий теңізі қоңыр түске боялды

Бұл жайт тұрғындарды алаңдатып отыр.

Ақтау қаласында Каспий теңізіне белгісіз сұйықтықтың құйылып жатқан бейнежазба тұрғындарды шошытты, деп хабарлайды Almaty-akshamy.kz.

Бейнежазба кеше түсірілген. Судың түсі өзгеріп, Каспий теңізіне қатты ағыспен құйылып жатқанын көруге болады. Ластанған суды көрген тұрғындар Каспийдің уланғанын айтып, дабыл қағуда. 

 «Әрине, у ғой! Балшық араласқан немесе лай су осыншама қоңыр түске боялмайды. Бұл жақын жердегі кәсіпорынның суы сияқты. Тексеріп, бұны тоқтату керек», – дейді Ақтау қаласының тұрғыны Айдана Әбіл.

Маңғыстау облыстық Экология департаментінің мамандарының айтуынша, судан сынама алынып, тексеру жүргізді. 

 «11 қазан күні кешкі уақытта әлеуметтік желіде Приморский елді мекенінде орналасқан "МАЭК-Қазатомөнеркәсіп" ЖШС-не қарасты №1 ТЭЦ ағынды каналындағы судың ластануы туралы бейнежазба таралды. Сонымен қатар, аталған каналға "Каспий су тұщыту зауыты" ЖШС және "Орбита" спорт кешені төгінді жұмыстарын жүргізеді. Маңғыстау облысы бойынша экология департаментінің мамандары жедел түрде оқиға орын алған жерге барып, арна бойындағы ластану аймағына, шолу жұмыстарын жүргізді», - деп хабарлады экологтар.

Алынған сынамалардың нәтижелері бойынша, «Опреснительный завод Каспий» ЖШС-нің ағызу құбырының көзінен және № 1 ТЭЦ Каспий теңізіне шығаратын құбырының көзінен алынған сынама құрамында темірдің және фосфаттың, мыстың артық мөлшері анықталды.

Енді күдікті компанияға қатысты іс-құжаттар жинақталып, сотқа жіберіледі.