Атырауда мектепке «бомба» қойылғаны туралы жалған ақпарат таратушы іздестірілуде
Жағдай Авангард ықшам ауданындағы мектептердің бірінде тіркелген
Атырауда «мектепке жарылғыш зат қойылды» деп елді дүрліктірген жалған террорист іздестіріліп жатыр. Ол хабарламаны мектептің электронды почтасына жіберген, деп хабарлайды Almaty-akshamy.kz.
Astanatv.kz сайтының жазуынша, бұл жағдай Авангард ықшам ауданындағы мектептердің бірінде тіркелген. Екінші сабаққа кірген мұғалімдер мен оқушылар дереу сыртқа шығарылды. Полиция жарылғыш затты іздестірді, ал балалар ауа-райының қолайсыздығына байланысты үйіне қайтарылды.
«Полицейлер 1300- ге жуық мектеп оқушылары мен қызметкерлерін эквакуациялады. Сондай-ақ мектепте ешқандай жарылғыштың жоқ екендігін анықтады. Қазіргі таңда мектеп әкімшілігінің ресми парақшасына осындай хабарлама таратқан тұлғаны анықтау жұмыстары жүргізілуде»,-дейді Атырау облыстық ПД баспасөз хатшысы Мейірім Ердәулет.
Айта кетерлігі, бірнеше күн бұрын мектепте бомба бар деп хабарлаған Атыраудың тағы бір тұрғыны ұсталған еді.
