Алматыда үш жолайырық салынып жатыр
Алматы қаласындағы жалпы жолдың ұзындығы 3097 шақырым
Алдағы 2 жылда Алматы қаласында 3 жолайырық толық пайдалануға беріледі. Сондай-ақ қаладағы 5 ауданда 209 шақырым жаңа жол салынады. Бұл шаһардағы жол қозғалысын реттеп, экологиялық ахуалдың жақсаруына сеп болмақ, деп хабарлайды «Хабар 24».
Алматы үшін түйіні шешілмеген мәселенің бірі - жолдағы кептеліс. Соңғы мәліметтерге сүйенсек қалада 500 мыңнан астам көлік тіркелген. Бұған күн сайын өзге облыстардан келетін машиналарды қосыңыз. Бұл түйіткілді шешу үшін соңғы 15 жылда 18 жолайырық салынды. Мұнымен қоса 11 бекеттік метро істеп тұр. Бірақ шаһарда әлі де жол қозғалысы қиын.
«Халық саны да көбейіп жатыр. Развязка болмаған жылдармен қазіргі жылдарды салыстырсақ, бәрібір кептеліс болып жатыр. Сол себепті халық саны көбейген соң жол мәселесін де тұрақты дамыту керек»,- дейді қала тұрғыны Ғазиз Ережеп.
Қала әкімдігінің тапсырысымен қазір салынып жатқан 3 жолайырық болашақта көлік қозғалысын жылдамдатады деген болжам бар. Оның бірі Бұқтырма көшесімен Құлжа тас жолының қиылысында салынуда. Бұл құрылысқа 11,5 млрд теңге бөлінген. Бүгінгі таңда жолайрықтың 90 пайыз жұмысы аяқталып, көпірлері пайдалануға берілді. Тек жерасты өткелдерінің құрылысы қалған.
«Ортада 1400 мм магистралдық трубалар жатқандықтан қосып үлгермедік. Сондықтан қалды. Қазіргі таңда осы объект бойынша инженерлік тораптар салынуда, су тарату құбырларының 80 пайызы аяқталды», - дейді мердігер компания инженері Мақсат Байшараев.
Алматы қаласындағы жалпы жолдың ұзындығы 3097 шақырым. Олардың 86 процентінде асфальт жабындысы бар. Әкімдік өкілдері 2023 жылы бұл көрсеткішті 95 пайызға жеткіземіз дейді. Атап айтқанда биыл Шаңырақ-1, Әлмерек, Қайрат, Ақжар, Алғабас шағын аудандарында жаңа жолдар салынып бітеді. Сондай-ақ көлік қатынасы үшін маңызды Рысқұлов даңғылы болашақта қала шекарасына дейін ұзартылады.
«Сайын көшесін Рысқұлов даңғылынан Мөңке би көшесіне дейін ұзарту. Оның ұзындығы 3 км болады. Бүгінгі күнге жұмыстар 55 проценте дейін дайын. Осы жылы біз Төле би көшесін Яссауи көшесінен қаланың шекарасына дейін жұмыстарды бастадық. Құрылыс жұмыстарын»,- дейді Алматы қаласы жол инфрақұрылымын дамыту бөлімінің жетекшісі Айдос Желдікбаев.
Сейфуллин мен Жансүгіров және Сайын мен Мөңке би көшелерінің қиылысындағы жолайырықтардың құрылысына да қомақты қаражат бөлінген. Ал Үлкен Алматы айналма жолы іске қосылса жүрісіміз жылдамдап, тынысымыз кеңейеді деген үміт бар.
