Шаһарда әлеуметтік инфрақұрылым қалай дамып жатыр?
Жаңа мектептер салу және колледждерді жөндеу
200 адамға арналған интернаты бар Абай атындағы 900 орындық жаңа мектепті 2023 жылға арналған бюджетті нақтылау және білім беру саласын қаржыландыруды ұлғайту аясында Дарын-1 шағын ауданына салу жоспарлануда, деп хабарлады Қаржы басқармасының басшысы Қанат Сухамбеков мәслихаттың кезектен тыс XI сессиясында. Жаңа оқу орнының ерекшелігі қазақ тілін тереңдетіп оқытуында болмақ, деп хабарлайды Almaty-akshamy.kz.
Әлеуметтік инфрақұрылымды дамыту жөніндегі жобаларды қаланың түрлі аудандарында жүзеге асыру жоспарланған. Мәселен, 8 мемлекеттік колледжде ағымдағы жөндеу бойынша жұмыстар жүргізіледі, ал 2 қолданыстағы колледжде – құрылыс және халық кәсіпшілігі, сондай-ақ технологиялар мен флористика колледжі материалдық-техникалық жағынан жаңартады. Бұл мақсатқа 1,3 млрд теңге бөлінеді.
Оқушылар үшін қолайлы жағдай жасау бойынша жұмыстар жүргізілуде: Нұркент шағын ауданындағы №201 мектепте 450 орындық қосымша құрылыс салу жоспарлануда, Бостандық ауданындағы Орбита шағын ауданында №145 мектеп ғимаратын сейсмикалық күшейту және күрделі жөндеу жұмыстары аяқталып келеді, басқа да рухани-білім беру нысандарын жабдықтауға қаражат бөлініп отыр.
«Даму бағдарламасы мақсатының бірін іске асыру аясында білім беру нысандарына қолжетімділікті арттыру үшін сахна тетіктерін, үлкен концерт залына арналған дыбыстық және жарық жабдықтарын толық ауыстыру және Оқушылар сарайының балалар музыка мектебі үшін музыкалық жабдықтар мен оқу жиһаздарын сатып алу бойынша жұмыстарды жүргізуге 1,3 млрд теңге сомасында қаражат көзделген», - деді Қанат Сухамбеков.
Бұған қоса, 3 мемлекеттік мектепте «Алматы қаласы оқушыларының денсаулығын басқару» пилоттық жобасын енгізу жоспарланып отыр. Ол оқушылардың денсаулығын сақтауға және нығайтуға бағытталған және теңдестірілген мәзір құруға арналған. Бұл мақсаттарға 1,3 млрд теңге көлемінде қаражат көзделген. Жалпы, әлеуметтік сала бюджетінің шығыс бөлігі 6,1 млрд теңгеге ұлғайды.
