Алматы тұрғындары Finiko қаржы пирамидасына алданып қалды
Жәбірленушілер 1,8 млн долларынан және 630 млн теңгесінен айырылған.
Алматыда The Finiko қаржы пирамидасы филиалының басшылығына қатысты сотқа дейінгі тергеу жүріп жатыр, деп хабарлайды Almaty-akshamy.kz
Finiko ұйымдастырушыларының үстінен 300-ден аса адам арызданған. Шығын мөлшері 1,8 млн долларын және 630 млн теңгені құрады.
«Қаржы нарығын реттеу және дамыту агенттігінің қорытындысына сәйкес, Thefiniko – симулятор. Қатысушылар бұл бағдарламаны сауда мен инвестициялау алаңы деп санап, ақша салған. Ал компанияның өзі әлемдік қор биржаларында тіркелмеген», - деп хабарлайды Қаржы мониторингі агенттігі.
Қылмыстық іс бойынша үш адам қамауға алынды. Басқаларының қаржы пирамидасына қатысы бар-жоғы анықталып жатыр.
Агенттік азаматтарды қырағы болуға және ақшасын күмәнді қаржы ұйымдарына салмауға шақырады.
The Finiko пирамидасына алданып қалған азаматтар агенттіктің сенім телефонына – +7 7172 708 478 хабарласа алады.