Алматы дәрігерлері HELLP-синдромы бар босанған әйелді құтқарды
14 күн бойы алматылық реаниматологтар жүктіліктің өлімге әкелетін асқынуы – HELLP-синдромы бар босанған әйелдің өмірі үшін тәулік бойы күрескен, деп хабарлайды Almaty-akshamy.kz Azattyq Ruhy-на сілтеме жасап.
Алматыдағы N2 қалалық перинаталдық орталығында дәрігерлер 36 жастағы әйелдің өмірін сақтап қалды.
Әйел жүктіліктің 36-аптасында шұғыл түрде кесарь тілігі арқылы босанды.
Бас дәрігердің орынбасары Қымбат Абраимованың айтуынша, HELLP-синдромы жағдайлардың 4%-дан 12%-ына дейін кездеседі. HELLP-синдромы көптеген органдардың жеткіліксіздігіне әкеледі, тіпті ана мен ұрықтың өліміне әкелуі мүмкін екен.
«Біз кесарь тілігін жасадық, шүкір, өмірі қыл үстінде тұрған әйел 2,114 грамм ұл туды. Қазіргі уақытта нәрестенің де, босанған әйелдің де жағдайы қанағаттанарлық. Операциядан кейін әйел 14 күн бойы реанимация бөлімінде тәулік бойы бақылауда болды, онда жаппай гемолизді емдеу, бүйрек, бауыр жеткіліксіздігінің және тромбоздың дамуын болдырмау үшін оған плазмалық алмасу және эритроциттік суспензияны трансфузиялау процедуралары жүргізілді», - дейді Қымбат Абраимова.
Дәрігерлердің әрекеттерінің арқасында науқас 14-күні реанимациядан бейінді бөлімге ауыстырылды, ал бүгін науқас баласымен бірге қанағаттанарлық жағдайда үйіне шығарылды.
