Тараздық әйел TikTok-тағы бейнежазбасы үшін жауапқа тартылды
Тараз қалалық сотында TikTok-тағы бейнжазбасы қатысты әкімшілік іс қаралды, деп хабарлайды Almaty-akshamy.kz Inbusiness.kz-ке сілтеме жасап.
Атап айтқанда, Тараз тұрғыны өзінің TikTok парақшасында "Көршілерім – ұрылар" деген бейнежазба жариялаған.
Ал жалаға жазықсыз іліккен ер адам сотқа Әкімшілік құқықбұзушылық туралы кодекстің 73-3-бабы 2-бөлігі ("Көпшiлiк алдында немесе бұқаралық ақпарат құралдарын немесе телекоммуникациялар желілерін пайдалана отырып жасалған жала жабу") бойынша арыз түсірді.
Жәбірленуші құқықбұзушыны жазалауды талап етпей, соттан онымен татуласуға және медиациялық келісімге келуге байланысты әкімшілік құқықбұзушылық туралы іс бойынша өндірісті тоқтатуды сұрады.
Осыған байланысты құқықбұзушы әкімшілік жауапкершіліктен босатылды. Соған қарамастан ол айыптау бабы бойынша кінәлі деп танылды.
