930 мыңнан астам тұрғын қызылшаға қарсы екпе салдырған
Оның 700 мыңға жуығы алты жасқа дейінгі бала.
Бұл туралы бүгін өтіп жатқан Үкімет отырысында Денсаулық сақтау министрі Ажар Ғиният айтты, деп хабарлайды Almaty-akshamy.kz
Жиынның күн тәртібінде санитариялық-эпидемиологиялық ахуал қаралатынын кеше хабарлағанбыз.
Денсаулық сақтау министрі Ажар Ғинияттың айтуынша:
2023 жылдың қорытындысы бойынша жұқпалы аурулар бойынша эпидемиологиялық ахуал тұрақты болып қалды.
Алдын алу шараларының арқасында 20 аса қауіпті жұқпалы ауру тіркелген жоқ, олардың арасында оба, тырысқақ және полиомиелит бар.
Сондай-ақ 39 инфекция бойынша, оның ішінде коронавирус, ротавирус және жіті ішек инфекциялары бойынша сырқаттанушылық төмендеді.
Алдын алу мақсатында өткен жылы қауіп-қатер тобына жататын 2,4 млн адам тұмауға қарсы екпе алды, бұл халықтың 12%-ын құрайды.
Жалпы эпидемиологиялық маусым басталғаннан бері стационарларда 31 мыңнан астам науқас емделді, 2 млн-нан астам науқас амбулаториялық ем алды.
Ел бойынша барлығы 10 мыңға жуық инфекциялық төсек-орын қойылды, олардың ішінде балалар үшін шамамен 3 мың төсек-орын қарастырылған.
2023 жылдың соңында елде 29 мыңнан астам қызылша жұқтыру жағдайы тіркелді, оның 80%-ы 14 жасқа дейінгі балаларға тиесілі.
1 қаңтардан бастап 1 674 қызылшамен сырқаттанушылық тіркелді.
Жағдайды тұрақтандыру үшін өткен жылы жоспар бойынша вакциналау жүргізілді, нәтижесінде алты жасқа дейінгі 700 мыңға жуық бала екпе алды.
Бүгінгі таңда қосымша вакциналау аясында 930 мыңнан астам адам екпе алды, күн сайын 20 мыңнан астам адам вакцина алуда.
