ҰҚШҰ Донбасқа бітімгерлерді аттандыруды ұсынды
Бірақ ол үшін Украинаның келісімі қажет
Украинаның шығысындағы жағдайдың шиеленісуіне байланысты Ұжымдық қауіпсіздік туралы шарт ұйымы Донбасқа бітімгерлер күштерін аттандыру туралы ұсыныс жасады, деп хабарлайды Almaty-akshamy.kz «Хабар 24» телеарнасына сілтеме жасап.
Бұл туралы осы ұйымның бас хатшысы Станислав Зась мәлімдеді. Оның айтуынша, бұл үшін Киевтің келісімі мен БҰҰ Қауіпсіздік кеңесінің рұқсаты қажет. Ұйым хатшысы қазір аймақтағы шиеленісті бейбіт жолмен бәсеңдету қажет екенін атап өтті. Айта кетейік, Донбассқа халықаралық бітімгерлік контингентті орналастыру мәселесі бұған дейін де бірнеше мәрте көтерілген. Алайда тараптар шетелдік әскерилерді орналастыру бойынша ортақ шешімге келе алмады.
«Донбассқа бітімгерлік күштерді аттандыруға болады. Бірақ бұл үшін Украинаның келісімі қажет. Өйткені бұл сол елдің аумағы. Бұдан бөлек БҰҰ Қауіпсіздік Кеңесінің мандаты керек және осы шешімді ұйымға мүше елдердің бәрі қолдауы тиіс»,-дейді ҰҚШҰ бас хатшысы Станислав Зась.
