Лудоманиядан арылудың жолы қайсы?
Алматы қаласы Жастар саясаты басқармасының қолдауымен, «Рух жаңғырығы» қоғамдық қорының ұйымдастыруымен «Интернетке тәуелділік және құмар ойындарының алдын алу» жобасы бойынша «Лудоманияға қарсы күрестегі өзекті мәселелер» тақырыбында «Дөңгелек үстел» өтті.
Жиынға Алматы қаласы мәслихатының депутаты Еркін Рақышев, әл-Фараби атындағы Қазақ ұлттық университетінің Философия кафедрасының аға оқытушысы Әбдірашит Бәкірұлы, мәдениеттанушы Бердалы Оспан мен психолог мамандар қатысып, жастар арасында белең алған құмар ойынның салдары мен онлайн казинолармен күрес жолы айтылып, атқарылған іс- шаралар талқыланды.
«Қазақстан бойынша 350 мыңнан астам адам осы дертке шалдыққан. Балалар мен жастар ғана емес, үлкендер де құмар ойынға беріліп, өзін қоғамнан жоғалтып алып жатады. Бұл жобаның аясында біршама жұмыс атқарылды. Жастармен жүзбе-жүз кездесіп, іс-шаралар жиі ұйымдастырылу керек», – деді «Рух жаңғырығы» қоғамдық қорының мүшесі Мұхамеджан Тоқтағұлұлы.
Тақырыпқа орай
Нұрсұлтан БЕКҚАЙЫРОВ, Алматы қаласы Жастар саясаты басқармасы Жастар бастамаларын қолдау бөлімі жетекшісінің міндетін атқарушы:
Түсіндірме жұмыстары жиі жүргізіледі
Жастар саясатының бастамасымен интернет тәуелділік пен лудоманияға байланысты бірнеше іс-шара өтті. 100-ге жуық заңсыз сайт анықталып, полицияға хабарланды. Осы жұмыспен айналысатын арнайы мамандар күдікті сайттардың заңсыз екенін анықтап, олардың лицензиясы бар-жоғын тексеру үшін полиция департаментіне жібердік. Қаладағы 20 университет пен 20 колледжде, базарда жұмыс істейтін жастарға лудоманияның зияны туралы түсіндірме жұмыстары жүргізілді. Осы мақсатта түрлі жобалар қолға алынады деген сенімдемін.
