Қ.Тоқаев: Халықаралық қауіпсіздіктің бұрынғы жүйесі ескіріп барады
Президент Қасым-Жомарт Тоқаев жаһандық қауіп-қатер мен оның шешіміне қатысты ойын білдірді.
Мемлекет басшысы атап өткендей, әлемдегі экстремизм мен терроризм мәселесі ушығып тұр. Ал энергетикалық дағдарыс көміртекті бейтараптыққа қол жеткізуде кедергі келтіріп тұр. Соңғы жылдарғы алапат табиғи апаттардан келген шығын 3 трлн АҚШ долларына жеткен, деп хабарлайды Almaty-akshamy.kz 24.kz-ке сілтеме жасап.
Жаһан жүзі экономикалық, экологиялық дағдарысқа ұшыраған тұста ұлтаралық араздық пен мемлекетаралық кикілжіңдер жығылғанға жұдырық боп тиетіні аян.
«Қазіргі қатерлерге төтеп беруде не нәрсеге иек артамыз? Бұл сауалға тарихтың өзі айқындап берген жалғыз ғана жауабы бар. Түзу ниет, диалог және халықаралық әріптестік. Жетістікке кепіл беретін өзге дүние жоқ. Қай мәселе болмасын, БҰҰ-ның жарғылық қағидасына сай Қазақстан қашан да дөңгелек үстелдің басында диалог құра отырып, келелі шешімге келуге үндейді. Үркітіп-қорқыту, санкция салу, күш қолдану – бұлардың ешқайсысы түйткілдің түйінін тарқатқан емес. Осындай кезде гуманизмнің қағидасына сүйенгеніміз абзал. Мұндайда әрине, дәстүрлі діндердің маңызы зор. Адам өмірі мен құқығы, әркімнің мүддесін ескеру, ашықтық - осының бәрі жаңа қауіпсіздік жүйесінің бағанасы болуы тиіс», - деді Қазақстан Республикасының Президенті Қасым-Жомарт Тоқаев.
