Қазақстан вейп контрабандасы бойынша дүниежүзінде 5 орында
Қазақстанда вейпке түбегейлі тыйым салынуы мүмкін.
Қазіргі таңда бүкіл әлем үшін өзекті мәселе Астанада талқыланды. Бүгінде Қазақстан вейп контрабандасы бойынша дүниежүзінде 5 орында тұр.
Дәрігерлер түрлі-түсті құтыдан шығатын тәтті түтінге оқушылар алданып отыр деп дабыл қағуда, деп хабарлайды Almaty-akshamy.kz.
Ел Президенді Қасым-Жомарт Тоқаев осы қауіпті үрдіспен күресуді жауаптыларға бес ай бұрын тапсырған. Өз сөзінде «Вейп пен есірткінің арасы бір-ақ қадам» деп шегелеп айтқан. Ал дүниежүзілік денсаулық сақтау ұйымының қазақстандық кеңсе басшысы кальян шегетіндерге де қатаң түрде шектеу қою керек дейді.
«Өкінішке қарай, бүкіл әлем бойынша кальян тұтыну артып барады. Кальян қоғамдық орындарда, бөлмелерде өте жиі пайдаланылады. Бұл темекі шегудің пассивті түрін арттырады. Кальян тартылған бөлмедегі ауа темекі шегілген үйдегі ауаның сапасымен бірдей. Ол бәрібір улы. Біз болашақ ұрпақты осындай зиянды өнімдерден қорғауымыз қажет», - деді ДДС ұйымының Қазақстандағы кеңсе басшысы Скендер Сыла.
