Каспий құбыр консорциумындағы шектеу мұнай өндіру көлеміне әсер етпейді
Мұнай тасымалдайтын 2 құрылғы жұмысын уақытша тоқтатты.
Энергетика министрі Болат Ақшолақов Мәжіліс алаңында Каспий құбыр консорциумындағы мұнай тасымалдау көлемінің төмендеуіне қатысты пікір білдірді, деп хабарлайды Almaty-akshamy.kz Egemen.kz сілтеме жасап.
Министр мұнай тасымалының азаюына Екінші дүниежүзілік соғыс кезінде жарылмай қалған миналарды залалсыздандыру жұмыстары себеп болғанын атап өтті. Энергетика министрлігінің басшысы аталған жұмыстар 15-25 маусым аралығында жүргізілетінін айтты.
«Мен өткен аптада айтып өткенімдей, теңіз түбінде тиісті жұмыстарды атқарар алдында тазарту іс-шаралары жүргізіледі. Өйткені ол жерде Екінші дүниежүзілік соғыстан қалған біршама оқ-дәрі әлі де бар», - деді Болат Ақшолақов.
Ол сондай-ақ Қашағанда 1 маусымнан 15 шілдеге дейін жөндеу жұмыстары жүргізілетінін, дегенмен, қазір мұнайды айлақтан тасымалдайтын бір құрылғы жұмыс істеп тұрғанын атап өтті.
«Ал қалған екеуі теңіз түбін тазарту жұмыстарына байланысты тоқтап тұр. Каспий құбыры консорциумына жеткізілетін мұнайға айлақтан тасымалдайтын бір құрылғының қуаты жетеді», - деп түсіндірді Болат Ақшолақов.
Министр жөндеу жұмыстары мұнай өндіру көлеміне әсер етпейді деп сендірді.
Айта кетсек, Каспий құбыр консорциумының мұнай тасымалдайтын 2 құрылғысы жұмысын уақытша тоқтатты.
