Алматыда мобильді экопатрульдер іске қосылды
11 экипаж күн сайын жолға шығады.
Алматыда мобильді экопатрульдер іске қосылды, деп хабарлайды Almaty-akshamy.kz Polisia.kz сайтына сілтеме жасап.
Қазір уақытта Алматы полициясы Жасыл экономика басқармасымен бірлесіп, экологиялық стандартқа сай келмейтін көліктерді анықтау мақсатында рейд жүргізіп жатыр. Көрсетілген заң бұзушылықтарды анықтау үшін арнайы техникамен жабдықталған патрульдік полицияның 11 экипажы күн сайын жолға шығады.
«Іс-шараның басынан бері екі жарым мыңнан астам көлік тексеруден өтті, оның 1 мың 193-і дизельдік отынмен, 1 мың 357-сі жағармаймен жүреді. Тексерілген көліктердің жалпы санының 23%-ы экологиялық стандарттарға сәйкес келмейді: 589 көлік құралында пайдаланылатын газ көлемі артық болып шықты. Сонымен қатар, бүгінде қалаға кіре берісте 19 экологиялық бекет орнату жұмыстары жүргізіліп жатқанын хабарлаймыз. Олар өлшеу құралдары, бейнебақылау камераларымен жабдықталған. Ағымдағы жылдың наурыз айынан бастап барлығы 139 мың 746 көлік тексерілді, оның 21 мың 751-інде улылық нормасынан асып кеткені анықталды», – деді Алматы қалалық ПД Жергілікті полиция қызметі басқармасының бастығы Манап Саттаров.
Анықтама үшін: ҚР ӘҚбК-нің 334-бабына сәйкес, шығарындыларындағы ластаушы заттардың мөлшері, сондай-ақ пайдалану кезінде олардан туындайтын шу деңгейі белгіленген нормативтерден (техникалық нормалардан) асатын автокөліктерді, басқа да жылжымалы көліктерді және қондырғыларды пайдалану ескерту жасауға немесе айыппұл салуға әкеледі, жеке тұлғаларға – 10, заңды тұлғаларға – 100 айлық есептiк көрсеткiш мөлшерiнде айыппұл салынады.
Осы баптың бірінші бөлігінде көзделген әкімшілік жаза қолданылғаннан кейін бір жыл ішінде қайталап жасалған іс-әрекет үшін жеке тұлғаларға – 20, заңды тұлғаларға 200 айлық есептiк көрсеткiш мөлшерiнде айыппұл салынуы ықтимал.
