6 935 адамға қандас мәртебесі берілді
Этникалық қазақтар негізінен оңтүстік облыстарға қоныстандырылған.
2021 жылғы 1 маусымға дейін 6 935 адам тарихи отанымен табысып, қандас мәртебесін алған, деп хабарлайды Almaty-akshamy.kz ҚР еңбек және халықты әлеуметтік қорғау министрлігінің баспасөз қызметіне сілтеме жасап.
Жалпы, 1991 жылдан бері республикаға 1 млн 77,3 мың этникалық қазақ оралған.
Ағымдағы жылдың басынан бері Қазақстанға келген қандастардың жартысынан көбі (76,3%) Өзбекстаннан, 10,4% – Қытайдан, 6,2% – Түрікменстаннан, 2,7% – Моңғолиядан және 4,4% - басқа елдерден.
Келген этникалық қазақтар негізінен Алматы (30,5%), Түркістан (15%), Маңғыстау (17,7%) және Жамбыл (8%) облыстарына, сондай-ақ Шымкент (11%) қаласына қоныстанды.
Биылғы 1 маусымдағы мәлімет бойынша, еңбекке қабілетті жастағы этникалық қоныс аударушылар саны 56,5%-ды, еңбекке қабілетті жастан кішілер 24%-ды және зейнеткерлер 19,5%-ды құрайды.
Еңбекке қабілетті жастағы кандидаттардың ішінен білім деңгейі бойынша 11,3% жоғары білімді, 39,5% орта кәсіби білімді, 45,5% жалпы орта білімді және 3,7% білімі жоқ.
