Сицилияда аптап ыстық және жарық пен су жоқ
Сицилияда аптап ыстық және температура реордтық деңгейге жетті. Катанияда жоғары температурадан жарық пен су сөндірілді, себебі жүйенің шамасы жетпей жатыр, деп хабарлайды Almaty-akshamy.kz Euronews-ке сілтеме жасап.
Жергілікті азаматтық қорғаныс қызметінің мәліметінше, дүйсенбі күні Катанияда 47,6°C тіркелген. Аптап ыстықтан жүз мыңдаған сицилиялық жарық пен сусыз отыр.
«Бір жағынан, климаттың өзгергені үшін зардабын тартып жатырмыз. Бұған бірнеше жыл бұрын назар аударуымыз керек еді. Екінші жағынан – жаңа жағдайға сәйкес келмейтін инфраструктура үшін», - деді Италия азаматтық қорғаныс министрі Нелло Мусумечи.
Бейсенбіден бастап Катанияда 500 мың адам кезекпен жарықсыз отырады, деді муниципалитет өкілі.
E-distribuzione – Enel алып италиялық компанияның еншілес фирмасы мұндағы электр энергиясын таратумен айналысады. Оның мәліметінше, «бірнеше апта бойы асфальт температурасы 50°C-қа жуықтаған». Оған ылғал ауа қосылғанда, «жылу дұрыс тарамай, кабельдерді зақымдап жатыр».
Электр энергиясының өшуі салдарынан бірнеше үйде су тоқтаған. Жалпы, 200-300 мың адам сусыз қалған, деді Сидра су беру желісі.
E-distribuzione компаниясы жүздеген техникалық маман мен ондаған генераторды тартқанын мәлімдеді. Жергілікті билік қарт адамдарға және басқа да осал топтағы адамдарға, сондай-ақ үйсіздерге кондиционерлер беріп, тұрғындардан кондиционерлерді қалыпты пайдалануды сұрады.
Кеше сицилиялық өрт сөндірушілер бірнеше өрт ошағымен күресті. Палермо әуежайының жанында өрт шығып, сейсенбі күні таңертең әуе айлағы бірнеше сағатқа жабылды. Өрттен теміржол көлігі зардап шекті.
