Мүмкіндігі мол он алты бағыт
Алматы қаласы мәслихатының депутаттары Алматы агломерациясын дамытудың 2029 жылға дейінгі кешенді жоспарын келісті, деп хабарлайды Almaty-akshamy.kz
Алматыда VIII сайланым Алматы қаласы мәслихатының кезектен тыс IX сессиясы өтті. Күн тәртібіндегі мәселелердің бірі – Алматы агломерациясын дамытудың 2029 жылға дейінгі Кешенді жоспарын келісу.
Кешенді жоспар агломерацияның орнықты әлеуметтік-экономикалық дамуын қамтамасыз етуге бағытталған. Құжат аумақтық, әлеуметтік, жол-көлік, инженерлік, экономикалық, экологиялық және цифрлық даму бойынша 16 стратегиялық бағыт аясындағы жобаларды қамтиды.
Өз сөзінде Алматы әкімінің орынбасары Асқар Әмрин атап өткендей, Кешенді жоспар аясында қала және облыс әкімдіктерінің дамудың негізгі бағыттары бойынша қызметін үйлестіруді көздейді.
«Цифрлық даму бағытында деректер базасын интеграциялау және бірыңғай геоақпараттық жүйені жүргізу жоспарлануда. Бұл агломерацияның картографиялық және қала құрылысы деректерін біріктіруге, қала маңы аумақтарының нысаналы мақсатын бекітуге және т.б. мүмкіндік береді, - деді алғы сөзінде Асқар Әмрин.
- Алматы қаласының көлік қаңқасын тиімді іске асыру үшін қажетті Алматы агломерациясының бірыңғай көлік моделі әзірленетін болады».
Асқар Әмрин «қала мен қала маңы аймағында қоғамдық көлікті интеграциялау, БАКАД-қа дейінгі 4 радиалды және 7 ішкі магистральдық көшелерді тесу, қала маңындағы теміржол жолаушылар тасымалын дамыту көзделгенін» айтты.
Оның айтуынша, жаңа білім беру және денсаулық сақтау нысандарын салу, сондай-ақ қала маңы аймағында жұмыс орындарын құру есебінен әлеуметтік саланы дамытуға бірыңғай тәсіл іске асырылатын болады. Сонымен қатар, бірыңғай жасыл агломерация дәлізі және тағы басқалар құрылады.
Естеріңізге салсақ, Алматы агломерациясын дамытудың 2029 жылға дейінгі Кешенді жоспарының жобасын Алматы қаласы мен Алматы облысының хатшылықтары «Агломерацияларды дамыту туралы» Заңның 13-бабын іске асыру шеңберінде әзірлеген болатын. Бұған дейін Кешенді жоспарды Алматы агломерациясының жергілікті кеңесі келіскен.
