Қазақстан мен Қырғызстан отыз жылда 160-тан астам құжат бекіткен
Екі ел дипломатиялық қатынас орнағанына 30 жыл толуын атап өтеді
15 қазанда Қазақстан мен Қырғызстан арасындағы дипломатиялық қарым-қатынастың орнағанына 30 жыл толады, деп хабарлайды Almaty-akshamy.kz ҚазАқпаратқа сілтеме жасап.
«Биыл 15 қазанда Қазақстан Республикасы мен Қырғыз Республикасы дипломатиялық қатынас орнағанына 30 жыл толуын атап өтеді. Осы 30 жылда біздің елдеріміз арасында 160-тан астам құжатқа қол қойылды, оның ішіндегі ең маңыздысы – 1994 жылғы 8 сәуірдегі Мәңгілік достық туралы шарт және 2003 жылғы 25 желтоқсандағы Одақтастық қатынас туралы шарт», - деді ҚР Сыртқы істер министрлігінің ресми өкілі Айбек Смадияров министрлікте өткен брифингте.
Ресми өкілдің айтуынша, екіжақты байланыстың жай-күйі мен перспективалары екі елдің мемлекет басшылары, үкіметтері мен сыртқы саяси ведомстволары деңгейінде үнемі талқыланады.
«Біздің елдеріміз көптеген халықаралық ұйымдар шеңберінде тығыз өзара іс-қимыл жасайды. Қырғызстан біз үшін аймақтағы негізгі саяси және экономикалық серіктестердің бірі. Қазақстан өзара іс-қимылдың барлық аспектілері бойынша Қырғыз Республикасымен көпжоспарлы ынтымақтастықты одан әрі тереңдетуге ұмтылады», - деді А. Смадияров.
