Еліміздегі қызғылт түсті көл неліктен тартылып қалды?

Павлодардың іргесіндегі қызғылт көлді тұз өндірушілер кептіріп жіберді деген сөз бекер.

Экология және табиғи ресурстар министрі бастаған арнайы комиссия Коряков көліне барды, деп хабарлайды Almaty-akshamy.kz Qazaqstan.tv сайтына сілтеме жасап. 

Бұрын бұл көл қызғылт түске боялып тұратын. Қазір суы тартылып, тұзы бетіне шығып жатыр. Бірақ бұдан еш қатер жоқ дейді мамандар.

«Біздің пайымдауымызша көлдің суы азайғандықтан түсі де өзгеріп отыр. Бұдан экологияға еш қауіп жоқ. Суы төмен түскен соң тұзы аппақ болып жатыр. Бұл көлді білеміз. Түсі өзгеріп отырады», - дейді ҚР экологиялық аудиторлар палатасының мүшесі Ахан Өмірбек.

Раушан Құсайынқызы 60 жылдан бері көл жағасындағы ауылда тұрады. Тұз алу үшін бұл жаққа бөгде адамдар келген емес дейді. Яғни су айдынына тұрғындардың зияны тимеді деп есептейді.

«Үш жылдан бері қыс болған жоқ. Қар жоқ. Жаңбыр жоқ. Сондықтан осындай. Біздің кезімізде осындай болған тұз», - дейді Коряковка ауылының тұрғыны Раушан Құсайынқызы. 

Бұл ғана емес, Павлодар және Успенка ауданы аумағындағы көлдердің де сортаңы шығып жатыр. Себебі, мамыр айынан бері аймақта жауын жоқ, күн ыстық. Сондықтан Экология министрлігі көл суының тартылып кетуінің басқа себебін іздемейміз дейді.

«Министрлік тарапынан бұл көлді қорғауға ешқандай қаржы қарастырылмаған. Артемий құрты бұл жерде жоқ. Сондықтан жануарлар әлемі үшін де, экологиялық тұрғыдан да еш қатері болмайды», - дейді ҚР Экология және табиғи ресурстар министрлігі экологиялық реттеу комитеті төрағасының орынбасары Ермек Омаров.

Үш жыл бұрын Астананың іргесіндегі Көбейтұз көлінде дәл осындай жағдай болған. Бір жыл ішінде көл тұтас құрғап, тамтығы да қалмады. Ал, Коряковка көлі жаңбыр суымен немесе қар қалың түссе қайта қалпына келуі тиіс дейді осы ауылдың тұрғындары.