COVID-19-дан өлім көрсеткіші 43%-ға төмендеген
Ал инфекцияға шалдығу 16%-ға азайған.
ДДСҰ бір апта ішінде әлемде COVID-19 вирусы бойынша өлім-жітімнің 43%-ға төмендегенін айтты, деп хабарлайды Almaty-akshamy.kz.
Өткен аптада 9 миллионнан астам адам коронавирус инфекциясын жұқтырды, 26 мыңнан астам адам қайтыс болды.
Дүниежүзілік денсаулық сақтау ұйымы хабарлағандай, көз жұму деректерінің саны алдыңғы жеті күнмен салыстырғанда 43%-ға төмендеді, ал инфекцияға шалдығу 16%-ға азайды.
Вирус жұқтырғандар санының азаюы ДДСҰ-ның барлық алты аймағында тіркелді. Бұл, әсіресе, Африкада (минус 19%), Еуропада (минус 16%) және Батыс Тынық мұхиты аймағында (минус 16%) байқалды.
Өлім-жітімнің төмендеу тенденциясы барлық аймақта тіркелді, әсіресе, Оңтүстік-шығыс Азияда (73%-ға) және Америкада (63%-ға) көрініс тапты.
