Аймақтарда жылумен қамту желілері әбден тозған
Биыл бюджетте жылу желілерін жаңартуға қаржы қарастырылады.
Өңірлерде желілердің тозу деңгейі 50 пайыздан асады. Кейбір аймақтарда бұл көрсеткіш 80 пайыздан асып кеткен, деп хабарлайды Almaty-akshamy.kz.
Бүгін өңірлерді дамытуға арналған Парламенттік тыңдауда осы секілді қордаланған мәселелер тағы бір пысықталды.
"Қабылданып жатқан шараларға қарамастан, өңірлерде инфрақұрылым мәселесі өзекті болып тұр, - деді Сенат төрағасы. - Екібастұз, Рудный, Риддер қалаларындағы апат - осының айқын дәлелі. Екібастұз — Ағадыр желісіндегі апаттың салдарынан бірден 6 облыста электр қуатын беру көлемі шектелді. Өкінішке қарай, бұл апаттар кездейсоқ болған жоқ. Бұл - осы саладағы қордаланған жүйелі проблемалардың көрінісі".
Жалпы, электр стансаларының негізгі қондырғыларының тозуы 57 пайызға жеткен. Ал жекелеген өңірлерде бұл көрсеткіш одан да асып кеткен.
«Шын мәнінде, қуатты өңірлер - еліміздің әлеуметтік-экономикалық әл-ауқаты мен бәсекеге қабілеттілігінің негізі. Мемлекет басшысы үнемі осы қағидаға баса мән беріп келеді. Сондықтан өңірлердің теңгерімді дамуына ықпал ету Сенаттың басым міндеттерінің бірі деп белгілеп отырмыз», - деді ҚР Парламенті Сенатының Төрағасы Мәулен Әшімбаев.