Алматыда жетінші баласына жүкті әйел қару-жарақ тонауға қатысқан
Алматыда жүкті әйел қару-жарақ дүкенін тонауға қатысқан
Әуезов аудандық ПБ жанындағы полиция бөлімінің мәліметінше, жетінші баласын күтіп жүрген әйел күйеуіне мылтық, тапанша, патрондар және басқа да оқ-дәрілерді ұрлауға көмектескен, деп хабарлайды Almaty-akshamy.kz Polisia.kz-ке сілтеме жасап.
«Үйдің ішін тінту кезінде тәркіленгендердің арасында тоғыз сайга стволы, екі мылтық, винтовка, тапанша, патрондар, резеңке сойылдар, ағаш тоқпақтар, сапер күрегі мен радиостанциялар болды. 25 жастағы Т.есімді жігіт ұрланған қару-жарақ салынған бумаларды жеке үйінің алдындағы аумаққа көмген. Сондай-ақ, күдіктінің мінген көлігі де анықталды. Бұл кезде оның қасында әйелі болған, ол күйеуінің ойланбай жасаған әрекетін, қылмыс жасауын тоқтатудың орнына ұрланған заттар салынған жәшіктерді көлікке тиеуге белсене көмектескен», – деді Алматы қалалық полиция департаменті басшысының орынбасары Берік Әбілбеков.
Заттай айғақтар тәркіленді. Аталған дерек ҚР ҚК-нің 291-бабы 3-бөлігімен (Қаруды, оқ-дәрілердi, жарылғыш заттар мен жарылыс құрылғыларын жымқыру не қорқытып алу) квалификацияланған. Әйелдің әрекетіне құқықтық баға беріледі.
