Алматыда Сенат депутаттарының сайлауы өтті
Дауыс беру пункті републикалық Достық үйінен ашылды.
Бүгін Алматы қаласында ҚР Парламентінің Сенатына депутаттар сайлауы өтті. Саяси іс-шараға қалалық мәслихат депутаттары, қаланың аумақтық сайлау комиссиясы мүшелерi, кандидаттардың сенім білдірілген адамдары, саяси партиялар мен қоғамдық бірлестіктердің байқаушылары, сондай-ақ бұқаралық ақпарат құралдарының өкілдері де қатысты, деп хабарлайды Аlmaty-akshamy.kz
Дауыс беру пункті республикалық Достық үйінен ашылды. Таңдаушыларға кандидаттар жайлы ақпараттар беру үшін олар туралы мәліметтер мен суреттер бірыңғай форматта дайындалып, дауыс беру пунктіне кіре берістегі стендтерге ілінген.
Сайлауға Алматы қаласынан жоғары палатаға сайланатын бір сенаторлық орын үшін өзін-өзі ұсыну жолымен төрт кандидат қатысты. Барлығы – әйел азаматтар. Алматы қаласының сайлау комиссиясы заң талаптары шеңберінде Қазақстан Республикасы Парламенті Сенатының депутаттығына кандидат ретінде «Алматы мемлекеттік сервис және технологиялар колледжі» МКҚК директоры Жаниязова Жарқын Лепесқызын, «Youthart» ҚҚ директоры Бекмурзаева Кристина Юрьевнаны, Алматы қаласы Жетісу ауданының әкімі Көкебаева Гүлнар Ахметжанқызы мен «Алматы қаласын дамыту орталығы» АҚ Басқарма төрағасының кеңесшісі Асанова Жанна Бейсентайқызын тіркеген болатын.
Олардың біреуі - мемлекеттік коммуналдық кәсіпорынның қызметкері, бір кандидат - мемлекеттік қызметші, біреуі - коммерциялық құрылымдардың қызметкері және тағы біреуі - қоғамдық ұйым өкілі. Мамандықтары бойынша: 2 заңгер, 1 инженер, 1 өнер саласының маманы, атап өтерлігі, бір кандидаттың екі мамандығы бар. Үміткерлердің орташа жасы - 45.
Таңдаушылардың бірлескен отырысынан кейін Алматы қаласы мәслихатының 38 депутатының 37-cі жанама сайлау құқығы негізінде жасырын дауыс берді. Дауыс беру аяқталғаннан кейін аумақтық сайлау комиссиясы бірден оларды санап, хаттама толтырды.
Дауыс беру нәтижелерiн Алматы қаласы сайлау комиссиясының төрағасы Айгүл Қалықова жариялады. Алматы қаласынан Қазақстан Республикасы Парламенті Сенатының депутаттығына сайлау бойынша кандидаттар Ж.Асанова 23, Г.Көкебаева 8, К.Бекмурзаева 3, Ж.Жаниязова 2 дауыс алды. Бір депутат бәріне қарсы дауыс берді.
Дауыс берудің нәтижелері туралы хаттама Орталық сайлау комиссиясына жөнелтілді. Сондай-ақ бекітілген регламентке сәйкес, дауыс берудің алдын ала қорытындылары туралы мәліметтер Қазақстан Республикасы Орталық сайлау комиссиясының электронды функционалына енгізілді.
