Алматыда Қазақстан-Ауғанстан сауда үйі ашылмақ
Қазақстанда ауған кәсіпкерлерімен бірлесе сауда үйін ашуды пысықтау керек. Бұл туралы Қазақстан мен Ауғанстан бизнес-форумында «Атамекен» ұлттық кәсіпкерлер палатасының төрағасы Райымбек Баталов мәлім етті, деп хабарлайды Almaty-akshamy.kz.
«Біз Ауғанстан өндірушілермен бірлесе осындай жобаны бастап, елімізде Қазақстан-Ауғанстан сауда үйін ашуға дайынбыз. Бұл тұрғыда онда ауған өнімдерінің тұрақты көрме залын жабдықтауға дайынбыз», - деді Р. Баталов.
Осы орайда бизнес-форумда аталған сауда үйін Алматыда ашу туралы ұсыныс айтылды.
Сонымен қатар Р.Баталов Қазақстан Үкіметінің бастамасымен Қазақстан Ауғанстанның Герат қаласында еліміздің сауда үйі ашылғанын еске салды.
Аталған шаһарды таңдау кездейсоқ емес, өйткені провинция Иран, Пәкістан және Түрікменстанға баратын жолдарды байланыстыру тұрғысынан маңызды.
«Алдағы уақытта қарастыруға дайын тұрған келесі қадам – бірлескен сауда-өнеркәсіп палатасын ашу. Қазір бұл тәжірибені бірқатар елдермен іске асырып жатырмыз», - деді ол.
Бұдан бұрын хабарланғандай, Қазақстан Ауғанстан арасындағы тауар айналымы 3 млрд АҚШ долларына жетуі мүмкін.
Қазақстан мен Ауғанстан арасындағы тауар айналымы 2022 жылы іс жүзінде 1 млрд АҚШ доллары (987,9 млн. АҚШ долл.) белгісіне жетіп, 2021 жылғы көрсеткіштерден екі есе артты. Тауар айналымының 90% қазақстандық экспортқа, негізінен өңделген өнімге тиесілі. Елдер арасындағы сауда биылғы 6 айда 343,6 млн АҚШ долларын құрады, оның ішінде Қазақстан экспорты 334,5 млн долларға жетті.
