Жыл басынан бері азық-түлік өнімдері 1%-ға қымбаттаған
Тамақ бағасының жылдық өсуі 10 пайызға жетті.
Тіпті, көп айтыла беретін әлеуметтік маңызы бар өнімдер де бір аптада 0,4%-ға, бір айда 0,7%-ға қымбаттады, деп хабарлайды Almaty-akshamy.kz Еnergyprom.kz сайтына сілтеме жасап.
Қабылданған шараларға, уәделер мен нұсқауларға қарамастан, әлеуметтік маңызы бар тауарлардың қымбаттауы жалғасуда. Мәселен, ағымдағы жылдың 25 қаңтарының қорытындысы бойынша, бұл сегменттегі бағаның апта сайынғы өсімі 0,4% болса, ал жыл басынан бергі өсім 0,7%-ды құрады.
Сонымен қатар, әлеуметтік маңызы бар санатқа енген 19 тауардың тек төртеуі ғана жыл басынан бері қымбаттамаған, тағы екеуінің бағасы сәл арзандаған. Қалған 13 тауардың бағасы қымбаттады, олардың кейбіреулерінің нарқы айтарлықтай өскен. Мәселен, жыл басынан бері сәбіз 2,2 пайызға, картоп 4,2 пайызға, қырыққабат 18,7 пайызға қымбаттаған. Оның үстіне мұның себебі бағаның маусымдық өсуімен байланысты емес.
Елдің ірі қалалары мен мегаполистерінің ішінде бағалардың 1%-дан астам қымбаттауы Нұр-Сұлтанда (плюс 1,5%), Көкшетауда (плюс 1,4%), Ақтөбеде (плюс 1,1%) және Таразда (плюс 1%) байқалған. Ескерту: бұл жерде барлық азық-түлік өнімдері емес, өмір сүру үшін қажетті әлеуметтік маңызды тауарлар туралы ғана айтылып отыр.
Еске сала кетсек, Қазақстан Республикасында азық-түлік бағасының өсуі мен осы сегменттегі түйткілді мәселелер бірнеше рет айтылған болатын. Мәселен, өткен жылдың қыркүйегінде Президент Тоқаев халыққа жолдауында азық-түлік өнімдеріне баға белгілеу мен бөлудің тиімсіздігін тағы бір мәрте атап өтіп, Қазақстан Республикасында ұзақ уақыт бойы тиімді жұмыс істей алмаған көтерме сауда орталықтарды және өндірушіден тұтынушыға дейінгі тізбектегі бағаларға бірыңғай бақылаудың жоқтығын атап өтті.
Биылғы жылдың 5 қаңтарында еліміздің әлеуметтік-экономикалық жағдайына арналған кеңесте Президент әлеуметтік маңызы бар азық-түлік тауарларының бағасын мемлекеттік реттеу қажеттігін тағы да атап өтті.
Саладағы бағаны тұрақтандыру мәселесін жаңа Премьер-Министр Әлихан Смайылов та көтеріп, бұл ретте әкімдіктер мен Ауыл шаруашылығы министрлігі жұмысының тиімсіздігін атап өтті.
«Шындығында, әлеуметтік маңызы бар азық-түлік тауарларының бағасының өсуін тежеу жұмысы бақылаусыз қалды», - деді Смайылов ағымдағы жылдың 29 қаңтарында өткен Үкімет отырысында.
Жалпы, ағымдағы жылдың қаңтар айында инфляция деңгейі айына 0,7 пайызды, жылдық динамика бойынша 8,5 пайызды құрады. Оның үстіне инфляциялық процестерді ілгерілетіп отырған азық-түлік тауарларының сегменті: сектордағы бағаның өсімі айына 1%-ды және жылына бірден 9,9%-ды құрады.
Жалпы Қазақстан Республикасының 17 өңірінің 9-ында азық-түлік бағасының ай сайын 1%-дан астам қымбаттауы байқалды. Оның ішінде 7 өңірдің осы саладағы жылдық баға өсімі 10 пайыздан асты.
Еліміздің бірде-бір өңірінде азық-түлік тауарларының құнын төмендету немесе ең болмағанда бағаны сол деңгейде ұстап тұру жағдайы байқалған жоқ.
