Тараз ежелгі Олимпиямен бауырлас қала атанды

Тараз - Олимпиада ойындарының Отаны - ежелгі Олимпиямен бауырлас қала атанды.

Бауырластық актісіне әр 2 жыл сайын Олимпиада алауын тұтату салтанаты өтетін әрі грек халқы үшін қасиетті жер саналатын Гера ғибадатханасының алдында қол қойылды, деп хабарлайды Almaty-akshamy.kz.

Қос шаһар арасында бауырластық қатынас орнатуға еліміздің Грекиядағы елшілігі мен Қазақстан-Грекия Іскерлік Кеңесі мұрындық болды. Ежелгі Олимпия Юнеско-ның әлемдік мұра нысандарының қатарында. Халықаралық Олимпиада Академиясы да осында орналасқан. Қос қала әкімдері өз өңірлері мен іскер топтары арасында экономикалық байланыстарды нығайтуға уағдаласты.

«2 мың жылдан астам бай тарихы бар, Шығыс пен Батыстың халықтары мен мәдениеттерінің түйісетін жері саналатын Таразбен бауырластық орнатқанымызға қуаныштымыз. Енді қос қала халқының ынтымағы бекіп, мәдени, іскерлік байланысымыз артады деген сенімдеміз»,  - деді Олимпия қаласының әкімі Георгиос Георгиопулус.

«Спорт, мәдениет саласы білім мен ғылым саласы бойынша да жобалар іске асырамыз деген жоспарымыз бар. Осы ежелгі Олимпия қаласының туризмді дамыту бойынша істеген жұмыстарын, олардың тәжірибесін де біз жан-жақты зерделеп, Тараз қаласында да туризмді дамыту бойынша нақты жұмыс жасаймыз деген жоспарымыз бар», - дейді Тараз қаласының әкімі Бақытжан Орынбеков.