Отандық ғалымдар жатыр мойны обырын анықтайтын ерітінді жасап шығарды
Ерітіндіні жасап шығару үшін ғалымдар 2 жыл жұмсаған
Ғалымдардың айтуынша, сұйықтықтың құрамы қарапайым. Сапасы шетелдік аналогтан кем емес. Сонымен қатар жергілікті ғалымдардың жетістігі бұл тәуелділіктен құтқарып, қыруар қаржыны үнемдеуге сеп болмақ, деп хабарлайды Almaty-akshamy.kz Qazaqtv.com сайтына сілтеме жасап.
«Сырттан кіргізетін ерітіндіге келсек, бір флаконның ішінде 17-18 мл болса, біреуінің құны біздікімен салыстырғанда 10 есе қымбат. Біз жасаған құрам бойынша оған бір арнайы реагенттермен біреуге тәуелді деген, ондай жоқ, қарапайым қолжетімді реагенттерден дайындалған», - дейді ұжымдық қолданыстағы ұлттық ғылыми зертхана меңгерушісі Қыдырмолла Ақатан.
Ғалымдарға кеңес беріп келген облыстағы онкологиялық диспансер мамандары ерітіндінің тиімділігін жоғары бағалады. Бүгінде қатерлі ісікпен күресетін дәрігерлер жаппай скринингтен өткізу үшін отандық өнімнің қолданысқа енгізілуін күтіп отыр. Мәселен, жыл сайын Шығыс Қазақстан облысында 50 мың адам жатыр мойыны қатерлі ісігін ерте анықтайтын диагностикадан өтеді екен.
«Тұрақтандырғыш ерітіндінің қолдану аясын кеңейту үшін біз қазіргі уақытта дәл осындай қасиеттері бар, яғни фиксациялау қасиетіне тән өзге де биоматериалдарды зерттеп жатырмыз. Сонымен қатар оны тасымалдау мәселесін де қарастырудамыз», - деді университет жанындағы ұлттық ғылыми лабораторияның ғылыми қызметкері Айдана Имашева.
Айта кетейік, авторлар бұл өнімді жаппай өндіріске енгізуге дайын. Наноөнімге патент алынып, еліміздегі медициналық бұйымдар реестіріне енгізілді.
