«Министр Кубогі» - дарынды балаларға арналған кешенді жарыс
Министр Кубогының жалпы жүлде қоры 10 миллион теңге
2-24 мамыр аралығында тұңғыш рет Қазақстан Республикасы Мәдениет және спорт министрінің Кубогі үшін кешенді жарыс өтеді, деп хабарлайды Almaty-akshamy.kz Қазақстан Республикасы Мәдениет және спорт министрлігінің сайтына сілтеме жасап.
Еліміздің спорт саласындағы 17 оқу орнында тəлім алып жатқан 2006-2007 жылы дүниеге келген жасөспірімдер халық арасында кең танылған спорт түрлері – бокс, дзюдо, грек-рим және еркін күрестен кім мықтыны анықтайды.
Командалық бәсекенің мақсаты – дарынды балалардың көзге түсуіне жағдай жасау, спорт мектеп-интернат-колледждер арасындағы бәсекелестікті арттыру. Жарысқа тек 2021-2022 оқу жылына дейін қабылданған шәкірттер қатыса алады.
Бүгін елордада жеребе тарту рәсімі болып, 17 команда 4 топқа бөлінді. Аталған командалар Нұр-Сұлтан, Алматы, Ақтөбе мен Тараз қаласында өзара күш сынасады.
Әр топтағы командалар айналмалы жүйе бойынша бір-бірімен кездеседі. Қорытынды нəтиже төрт спорт түрі бойынша жеңіп алған медальдар сапасы бойынша анықталады. Тек 1-орын алған командалар жартылай финалға шығады. Онда А тобының жеңімпазы С тобының үздігіне, В тобының мықтысы D тобының жеңімпазына түседі. Жартылай финал жəне финал 22-24 мамыр аралығында Нұр-Сұлтан қаласындағы Ж.Үшкемпіров атындағы жекпе-жек сарайында өтеді.
«Алдағы уақытта «Министр Кубогі» сарапқа салынатын спорт түрлерінің санын көбейтуге тырысамыз. Мұндағы мақсат – спорт мектеп-интернат-колледждер арасындағы бәсекелестікті арттыру. Осы кешенді жарыс бізге әр спорт түріндегі білікті бапкерлерді анықтауға көмектеседі, деп сенеміз. Сонымен қатар арнаулы оқу орындарындағы өзекті мәселелерді анықтап, міндетін айқындаймыз, деп ойлаймын», - деп айтты МСМ Спорт жəне дене шынықтыру істері комитеті төрағасы Самат Ерғалиев жеребе тарту рәсімі кезінде.
Министр Кубогының жалпы жүлде қоры 10 миллион теңге. 1-орын алған командаға - 5 млн, 2-орынға – 3 млн, 3 орынға – 2 млн. теңге беріледі.
Айта кетейік, жарыстың бас төрешісі: Бекболат Байжанов – ҚР МСМ Спорт жəне дене шынықтыру істері комитеті төрағасының орынбасары;
Жарыстың бас хатшысы: Оралбай Жақсымбетов – Республикалық спортты дамыту дирекциясы директорының орынбасары.
