Көмек көптік етпейді
«Қазпошта» АҚ Екібастұз тұрғындарына гуманитарлық көмек жөнелтуді қолға алды
«Қазпошта» акционерлік қоғамы Екібастұз тұрғындарына гуманитарлық көмек жөнелтуді қолға алады. Бұл жайында компанияның басқарма төрағасы Әсел Жанасова мәлім етті, деп хабарлайды Almaty-akshamy.kz ҚазАқпаратқа сілтеме жасап.
«Достар, Екібастұзда көп қабатты және жеке тұрғын үйлер жылусыз қалды. Алда 30 градустан төмен аязды күндер бар. Біздің компания да қайырымдылық істен сырт қала алмады: бүгін "Қазпошта" гуманитарлық көмек жинауды бастайды. Астана мен Алматыдағы кез келген "Қазпошта" бөлімшесіне жылытқыш, көрпе, жылы киім және басқа керек заттар әкелуге болады. Барлық көмек Екібастұзға компаниямыздың күшімен жеткізіледі», - деп жазды Әсел Жанасова Facebook парақшасында.
Еске сала кетейік, 27 қарашада Екібастұз жылу электр орталығында апат болып, қала тұрғындары жылусыз қалған еді.
