Коронавирустың тарауына байланысты көлік құралдарына қойылатын талаптар күшейтілді

Коронавирустың тарауына байланысты көлік құралдарына қойылатын талаптар күшейтілді
Сурет: Kommersant.ru

Коронавирус инфекциясының тарауына байланысты Ведомствоаралық комиссияның 2022 жылғы 1 шілдедегі шешіміне сәйкес, санитариялық-профилактикалық және санитариялық-эпидемияға қарсы іс-шараларды жүргізу мақсатында Көліктегі Бас мемлекеттік санитарлық дәрігердің биылғы 8 шілдесінен бастап күшіне енетін «Көлік объектілерінде коронавирус инфекциясы бойынша санитариялық-профилактикалық және санитариялық-эпидемияға қарсы іс-шараларды жүргізу туралы» қаулысы қабылданды. Бұл туралы Almaty-akshamy.kz хабарлайды Inform.kz-ке сілтеме жасап.

Аталмыш құжатқа сәйкес тұрақты жолаушылар тасымалын (әуе, су, темір жол, метрополитен) жүзеге асыратын ұйымдар көлік құралдарындағы ауа баптау, желдету жүйелеріне тексеру жүргізуді және желдеткіш сүзгілерін ауыстыруды;

мамандандырылған көлік құралдарын (перрондық автобустарды) қоспағанда, көлік құралына жолаушыларды орындардың санынан аспайтын мөлшерде отырғызу;

көлік құралының салонын желдету, дезинфекциялау құралдарын қолдана отырып, салонды ылғалды тазалау және ауысым аяқталғаннан кейін қоғамдық көліктерге дезинфекция жүргізуді қамтамасыз ету талап етіледі.

Халықаралық әуежайлардың, теміржол вокзалдарының, теңіз және өзен порттарының басшыларына ауа температурасы мен ылғалдылығының оңтайлы жағдайын қамтамасыз ету үшін тазалауды, жууды, дезинфекциялауды, желдету және ауаны баптау жүйелерінің сүзгілерін ауыстыруды қамтамасыз ету;

жолаушылардың орындарын жуу және дезинфекциялау құралдарын пайдалана отырып, жалпы тазалау жұмыстарын жүргізу;

барлық бөлмелерді жиі желдету; күту залдарында, ана мен бала бөлмелерінде, санитариялық тораптарға кіре берісте қолды тазарту құралдарын орнату;

қызметкерлер арасында COVID-19 кезінде жеке қорғану құралдарын қолдану алгоритмі, жеке/қоғамдық гигиена ережелерін сақтау, кварц шамдарын пайдалану кезінде қауіпсіздік шараларын сақтау;

қызметкерлердің маскалар мен антисептиктерді міндетті түрде қолдануы; оқшаулау бөлмесі бар медициналық немесе сауықтыру пунктінің тұрақты жұмысы;

кемінде 60 минут сайын жолаушыларды радиохабар (дауыс зорайтқыш арқылы хабарлау) арқылы коронавирус инфекциясының алдын алу шаралары туралы хабардар ету.

«Бұл ретте жолаушыларға әуежайлардың, вокзалдардың, жолаушыларға қызмет көрсету пункттерінің ғимараттарында, қоғамдық көлікте жүргенде бетперде кию ұсынылады»,-делінген Көліктегі санитарлиялық-эпидемиологиялық бақылау департаментінің баспасөз қызметі таратқан ақпаратта.