Алматылық Лаура Мұхтар Түркияда өтетін сұлулық байқауына қатысады
Алматылық Лаура Мұхтар Түркияда өтетін Miss Aura International 2021 сұлулық байқауына Қазақстан атынан қатысады, деп хабарлайды almaty-akshamy.kz Tengrinews.kz сілтеме жасап.
Байқау 20 қыркүйек пен 5 қазан аралығында Анталияда өтеді. Байқауға әлемнің әртүрлі елінен келген 70-тен аса қыз қатысады. Дәстүр бойынша Miss Aura International таланттар байқауы, сән көрсетілімдері, кешкі және ұлттық көйлектер көрсетілімі секілді бірнеше кезеңдерден тұрады. Қыздар әлеуметтік және қайырымдылық шараларға қатысады.
Бойжеткен Жүргенов атындағы Қазақ ұлттық өнер академиясында режиссер мамандығын тәмамдаған. Қазір Лаура хореограф, сонымен қатар фильмдерге түседі және модель ретінде жұмыс істейді. Ол тенниске, атқа мінуге, кітап оқуға және ән айтуға қызығады.
Еске салайық, бір жыл бұрын Түркияда өткен Miss Aura International байқауына Қазақстан атынан модель Фариза Рахман қатысып, жүлделі орынға іліге алмаған болатын.
