Алматылық құтқарушылар Іле Алатауында адасқан екі туристі тапты
Туристер қайтар жолда адасып, қараңғыда төменге түсе алмаған
2023 жылғы 26 наурызда сағат 23:32-де Алматы ТЖД кезекші-диспетчерлік бөліміне "Аюсай" шатқалы мен сарқырамасының аумағында тауда ер адам мен әйел адам жоғалып кетті деген хабарлама келіп түскен, деп хабарлайды Almaty-akshamy.kz.
Алматы төтенше жағдайлар департаментінің баспасөз қызметінің мәліметінше, туристер қайтар жолынан адасып, қараңғыда төменге түсе алмаған. Олар өздері көмек сұрап хабарласқан.
"Адасқандардың орналасқан жері туралы мәлімет Алматы әкімдігі құтқару қызметінің жедел кезекшісіне жіберілді. 4 құтқарушы бір техникамен іздеу-құтқару жұмыстарына жолға шықты. Іздеу орнына келген кезде, адамдардың іздері болған жоқ, аталған жерде аз көлемді көшкін болды", - делінген хабарламада.
Арада бір сағат өткеннен кейін, жоғалған ер адам ТЖД кезекші бөліміне қайта қоңырау шалып, олар жолды тауып, көтеріле бастағандарын хабарлаған, сөйтіп, байланыс қайтадан үзілген. Түнде сағат 4:20-да "Аюсай" шатқалына қосымша құтқару қызметінің және КСП "Тұйық-Су" 7 құтқарушысы мен 2 бірлік техникасы жіберілген. Туристер қайтып байланысқа шықпаған.
"06.00-де ТЖМ Республикалық жедел-құтқару жасағының 7 адамнан құрылған жедел тобын, оның ішінде бір кинологиялық есепті іздеуге жіберу туралы шешім қабылданды. Республикалық жедел-құтқару жасағының құтқарушылары спутниктік байланыспен жарақталған. Космостанцияға келген Республикалық жедел-құтқару жасағының құтқарушылары шатқалдан төмен қарай іздеу жұмыстарын жүргізе бастады. Тәуліктің қараңғы уақытында, қауіпті тік беткейлермен, төменгі температурада жоғалған туристерді іздеу жұмыстары тоқтаған жоқ", - делінген хабарламада.
Іздеу жұмыстары таң бойы жалғасқан. Сағат 09:57-де құтқару қызметінің іздестіру тобы туристерді таудың жотасындағы бірінші сарқырамадан жоғары орналасқан "Аюсай" шатқалынан тапты. Зардап шеккендермен визуал байланыс орнатылды. Содан кейін құтқару операциясы жалғастырылды. Жұмысты тік беткейлер мен қардың көптігі қиындатты.
Сағат 15:45-те құтқару қызметінің құтқарушылары мен Республикалық жедел-құтқару жасағының жедел тобы зардап шеккендерді Апаттар медицинасы орталығының дәрігерлер бригадасына жеткізді. Зардап шеккендер медициналық көмекке мұқтаж емес.
