Алматы қаласының Бостандық ауданында коттедж салу туралы іс сотқа берілді
Бүгін Алматы әкімі Ерболат Досаев Бостандық ауданы тұрғындарымен кездесті.
Оның барысында аудан тұрғындары басшылыққа өздерін толғандырған жайттарға қатысты сұрақтарын қойды, деп хабарлайды Almaty-akshamy.kz.
Аудан тұрғындарының бірі:
«Мен Бостандық ауданында "Алатау-2" бау-бақша серіктестігінде тұрамын. Менде бұрынғы сайдың орнында Baganashil Hills коттедж қалашығын салу туралы сұрағым бар. 15 жыл бұрын бұл жыра толтырылды. Енді олар коттедж қалашығын салуды жоспарлап отыр - 74 коттеджді. Құрылыстың салдарынан кейбір көршілердің үйлерінің қабырғалары жарылып жатыр. Бірнеше жылдан кейін бұл барлығына қиындық тудыруы мүмкін, өйткені жыра – құрғаған өзен арнасы. Бұл су қайта ағуы мүмкін, оны кез келген су маманы растай алады», - деген мәселені көтерді.
Оған Алматы қаласы қала құрылысын бақылау басқармасының басшысы Бақытжан Наурызбеков:
«Бүгінгі күні біз құрылысты бұзу үшін сотқа жүгіндік. Онда 10-ға жуық нысанның - ЖТҚ, екі қабатты үйлердің құрылысы заңсыз басталды. Құрылысқа тыйым салу бойынша талап-арыз дайындалу үстінде», - деп жауап берді.