Испанияда ковид тұмау сияқты әдеттегі аурумен теңестіріледі
Бұл елдегі эпидемиологиялық жағдай жақсара бастады.
Испанияда бүгіннен бастап коронавирустық инфекция тұмау сияқты әдеттегі эндемикалық аурумен теңестіріледі, деп хабарлайды Almaty-akshamy.kz COVID-19 таралуына жол бермеу жөніндегі ВАК-тың телеграм каналына сілтеме жасап.
СOVID-19 инфекциясын жұқтырған және белгілері бар адамдар қалыпты өмір салтын жалғастыра алады және үйде оқшаулау режимін сақтау ол үшін міндетті болмайды.
Бұрынғы талаптар тек қауіп-қатер тобындағы адамдарға, яғни 60 жастан асқан, иммунитеті әлсіреген адамдарға, сондай-ақ жүкті әйелдер мен медицина қызметкерлеріне қатысты болады.
Мұндай жаңалықтарға қарамастан, елде жабық қоғамдық орындарда, сондай - ақ қоғамдық көліктерде, автобустарда, пойыздарда, ұшақтарда медициналық маскалар кию міндетті болып қала береді.
Ал мейрамханаларда бір үстелдегі қонақтар санына шектеулер болады. Өткен жұмада Sars-CoV-2 таралуының жеті күндік көрсеткіші 100 000 тұрғынға шаққанда ел бойынша орта есеппен 227 болды.
