Демалыс күндері ауа райы күрт өзгереді
Синоптиктер Қазақстан бойынша демалыс күндеріне арналған ауа райы болжамын ұсынды, деп хабарлайды Almaty-akshamy.kz.
«Қазгидромет» РМК ұсынған мәліметке сүйенсек, алдағы күндері батыс, оңтүстік, Ақтөбе және Ұлытау облыстарында күн жауын-шашынсыз болады.
Апта соңында солтүстік өңірлерде, Қарағанды облысында жаңбыр жауады.
«Елдің шығысында және оңтүстік-шығысында жаңбыр жауады, түнде таулы аймақтарда қар аралас жаңбырға айналуы мүмкін», – деп хабарлады «Қазгидромет» РМК баспасөз қызметі.
Синоптиктердің мәліметінше, түнде және таңертең еліміздің солтүстігінде, шығысында және орталығында 2 градусқа дейін үсік жүреді.
Күндіз республиканың батысында ауа +25+30°-қа дейін жылынады.
Солтүстік, оңтүстік облыстарда және республика орталығында ауа температурасы +18+23°-қа дейін көтерілсе, республиканың шығысында ауа температурасы +7+13°-қа дейін төмендейді.
