Берлинде Қазақстанның Республика күніне арналған концерт өтті

«Майстер-зал» сахнасында еліміздің атынан маңғыстаулық әртістер өнер көрсеткен.

Неміс тыңдармандары «Ақшағыл» және «Жорға» ансамбльдерінің музыкалық шеберлігіне тәнті болды. Жетіген, домбыра, дабыл, қылқобыз. Мерекелік кешті ашқан «Ақшағыл» этно-фольклорлық ансамблі неміс тыңдарманын таңдай қақтырды, деп хабарлайды Almaty-akshamy.kz 24.kz-ке сілтеме жасап. 

Себебі, әр өнерпаз аталған 5 аспапта ойнай алады. Ансамбль құрамында Құрманғазы атындағы ұлттық консерватория түлектері де бар. Ұлы даланың ғажайып әуені алғашқы ноталардан-ақ тыңдарманын баурап алды.

«Керемет концерт болды. Көзімді жұмған кезде мен өзімді Қазақстанның кең байтақ даласында жүргендей сезіндім. Аспаптар шынайы атмосфераны жеткізе білді. Елдеріңізді Республика күнімен шын жүректен құттықтаймын! Қазақстанға серпінді даму тілеймін»! - дейді Бундестаг депутаты Катрин Будде. 

Ширек ғасырдан бері сахнада төрінде жүрген ақтаулық «Жорға»ансамблі қазақтың бекзада би өнерін паш етті. Көрермендер қатарынан Бундестаг депутаттары, кәсіпкерлер, тіпті, Германияның экс-президенті Хорст Келер де көрінді. 

«Музыканттар мен бишілер қазақ мәдениетін толық жеткізе алды. Мен атқа мінген шабандоздар, жабайы аңдар мен аңшыларды көргендей әсерде болдым. Сондай-ақ, қазақтың үйлену тойына барып келгендей болдық. Осындай концерттердің, өнерпаздардың арқасында біз Қазақстан туралы көбірек біле түсеміз. Сіздерді Республика күнімен құттықтаймын және өсіп-өркендеу тілеймін»! - Германияның Федералды Президенті (2004-2010 ж.ж.) Хорст Келер.

«Бұл ерекше кеш болды. Әр түрлі аспап пен музыканттардың шеберлігі мені таң қалдырды. Ғажап концерт болды! Құрманғазы, Дәулеткерей, Нұрғиса дарабоздардың және Себастьян Бахтың өлмес туындылары ойналды. Дәл осындай концерт Мюнхен мен Франкфурт қалаларында да өтеді», - дейді Төменгі Саксониядағы ҚР құрметті консулы Гюнтер Папенбург.