Қызылордада дәрігерлер 72 жастағы әйелдің оң жақ аналық безінен салмағы 5 килограмм болатын ісікті алды, деп жазады Alash.KZ.
- Жалпы әйелдерде түрлі жағдайларға байланысты әртүрлі киста кездеседі. Аналық без кистасы — аналық без құрылымында пайда болып, оның көлемін бірнеше есе арттыратын сұйықтық немесе жартылай сұйық құрамы бар көпіршік тәрізді масса. Біз пациентке лапоротомиялық әдіспен ота жасадық. Ол кісі ауру жанына батса да осыған дейін шыдап жүре берген. Мұндай жағдай әртүрлі жаста кездесе береді. Тіпті жақында 18 жастағы қыздан да алынды, - деді гинеколог дәрігер Айдос Қамзиев.
Отаны хирург дәрігер, PhD, аурухана басшысының хирургия жөніндегі орынбасары Ербол Серікұлы бастаған мамандар жасады. Пациент отадан кейін палатаға шығарылды. Дәрігерлер оның денсаулығын тұрақты деп бағалап отыр.
