Ақтөбе полициясы Қандыағаш қаласында өз үйінде марихуана өсірген 26 жастағы ер адамды анықтап, оны ұстады, деп хабарлайды Alash.kz.
Күдікті үйінде кішкентай жасырын бөлме жасап, онда өсімдіктерді арнайы күтіп-бағумен айналысқан. Тергеу барысында белгілі болғандай, ер адам өсімдіктің жақсы өсуі үшін бөлмеге желдеткіштер мен жарық шамдарын орнатып, бұталарды үнемі суарып, тыңайтқышпен қамтамасыз еткен.
Полицейлер тәркілеген заттар арасында шамамен 610 грамм марихуана және 419 грамм кептірілген марихуана бар.
Сонымен қатар күдіктіден газды револьвер және аңшылық мылтықтың қысқартылған нұсқасы да алынды. Қазіргі уақытта бұл дерек бойынша тыйым салынған, наркотикалық заттар құрамындағы өсімдіктерді заңсыз өсіру фактісі бойынша тергеу амалдары жүргізілуде.
Күдікті уақытша ұстау изоляторына қамауға алынды.
