Жамбыл облысында кәмелетке толмаған екі балаға қатыгездік көрсетіп, жүйелі түрде ұрып-соққаны үшін айыпталған Талас ауданының тұрғынына қатысты қылмыстық іс сотқа жолданды. Тергеу аяқталып, айыптау актісі прокурорға жіберілген, деп жазады Alash.kz.
Алайда жәбірленуші балалардың туыстарының айтуынша, күдікті Ұзақбай Тұрбаев сот шешімімен үйқамаққа жіберілген. Балалардың нағашы әпкесі бұл шешімге наразы екенін жеткізді.
“Жамбыл облысының соты бізге айтпай, күдіктіні үйқамаққа босатып жіберген. Ол заң бойынша екі ай бойы қамауда отыруы тиіс еді. Ал қазір балалардың мазасы қашып отыр. Құзырлы органдар жауап бере алмайды, “адвокаты мықты” дейді. Сонда заң қайда қарауда? Президент пен министрлікке үндеу жолдаймын”, – дейді жәбірленушілердің туысы.
Бұған дейін полиция күдіктіні ұстағанын хабарлаған. Қолға түскен азамат бастапқыда қамауға алынған болатын. Жәбір көрген балалар Тараз қаласындағы Балаларды қолдау орталығына орналастырылып, оларға психологиялық және құқықтық көмек көрсетілді. Ішкі істер министрлігі бұл істі ерекше бақылауда ұстайтынын мәлімдеген.
Еске сала кетейік, Жамбыл облысында өгей әке кәмелетке толмаған балаларды мал бақтыру үшін құлдықта ұстағаны туралы ақпарат тараған еді.
