Маңғыстау облысында жоспарлы операциядан кейін науқастың жағдайы күрт нашарлап, жансақтау бөліміне түсті, деп хабарлайды Alash.kz.
Оқиға 7 тамызда болған. Арада бірнеше күн өткенде пациенттің жақындары күтпеген деректерге қол жеткізіп, мән-жайды білген.
Науқастың жұбайы Роза Дыбыстың айтуынша, оларға тіпті операция бөлмесінен жазылған аудиожазба берілген. Сол жазбаны тыңдаған туыстары дәрігердің бейқам сөздеріне қатты шошынған.
“Көп болса, Маңғыстаудың бір адам өледі. Несіне қиналасың?” – деген сөздерді дәрігердің өзі айтқаны естілді, – дейді Роза Дыбыcова.
Оның сөзінше, ота жасаған дәрігер анестезиологтың нұсқауын елемей, операцияны өз бетінше бастаған. Қажет емес жерден тілік жасап, “наркозсыз-ақ жұмыс істеймін” деп, процестің барысына өрескел араласқан.
“Салдарынан күйеуім 2,5 литр қан жоғалтты. Қазір жағдайы өте ауыр”, – дейді ол.
Оқиғадан кейін кардиохирург кінәсін мойындап, кешірім сұрап, жұмыстан кету туралы арыз жазған. Алайда Құлжановтың туыстары мұны жеткіліксіз деп санайды. Олар дәрігерді “қасақана кісі өлтіруге оқталды” деп айыптап, заң аясында қатаң жаза қолдануды талап етуде.
“Біріншіден, күйеуімнің денсаулығын қалпына келтіруге жан-жақты көмек қажет. Ол әлі де ұзақ уақыттық оңалтуды қажет етеді. Екіншіден, жоспарлы операция кезінде неліктен осынша қан кеткенін тәуелсіз сарапшылар анықтап беруін сұраймын. Ең бастысы – істі “қасақана адам өлтіруге оқталу” бабына қайта саралауды талап етемін”, – дейді Роза Дыбыcова.
Оның айтуынша, аурухана әкімшілігі болған жағдайды жасырып қалуға тырысқан.
Ал облыстық денсаулық сақтау басқармасы бұл жайтқа байланысты қылмыстық іс қозғалғанын растады.
“Қазір тергеу жүріп жатыр. Істің ерекшелігіне байланысты толық мәлімет бере алмаймыз. Қосымша ақпарат тек тергеу аяқталғаннан кейін ұсынылады. Сонымен бірге, әлеуметтік желілердегі түрлі қауесеттерге сенбеуге шақырамыз. Пациенттің жағдайы тұрақты ауыр: ол жансақтау бөлімінде, есін біледі, дәрігерлердің бақылауында”, – деді Маңғыстау облыстық көпсалалы ауруханасының баспасөз хатшысы Жұлдызай Қалиева.
