Әлеуметтік желілерде Атырау қаласындағы мектептердің бірінің бұрынғы қызметкері білім ордасының басшылығына қатысты ауыр айыптаулар жариялады, деп жазады Alash.kz.
Оның айтуынша, ол 2013 жылы №30 мектепке жұмысқа орналасқаннан кейін, ұжымдық шараға қатысқан. Сол кештен соң өзін еріксіз жағдайда қалғанын, есінде тек дастархан басында отырған сәті ғана қалғанын, ал таңертең оянғанда өзін жалаңаш күйде тапқанын жеткізді. Айтуынша, бұл жиын мектеп директорының орынбасарының үйінде өткен.
Бұрынғы қызметкердің сөзінше, кейін ол орынбасардан қысым көріп, жасөспірім ұл балаларды тауып беруге мәжбүрленген. 12 жыл өткен соң ол бұл жайтты жария етуге бел буған, себебі сол кездегі орынбасар бүгінде қаладағы өзге мектептің директоры болып қызмет атқарып отыр.
Аталған жағдайға қатысты Атырау облыстық Білім басқармасы ресми пікір білдірді:
"Әлеуметтік желілерде мектеп мұғаліміне қатысты жарияланған деректер бойынша Білім басқармасы тексеріс жүргізеді. Сонымен қатар бұл ақпаратты жариялаған азаматқа құқық қорғау органдарына жүгініп, оқиғаны жан-жақты әрі әділ қарауға мүмкіндік беру ұсынылады", – делінген хабарламада.
