Қазақстанның Ресейдегі елшісі Дәурен Абаев қазақстандықтардың шамамен 95%-ы орыс тілінде сөйлейтінін айтып, бұл елдің басты артықшылықтарының бірі екенін атап өтті, деп жазады Alash.kz.
ТАСС агенттігіне берген сұхбатында ол қазақ тілінің мемлекеттік тіл ретіндегі мәртебесі жылдан-жылға нығайып келе жатқанын, сонымен қатар халықтың көпшілігі орыс тілін еркін меңгергенін ерекше атап өтті.
"Қазақстанда халықтың 95%-ы орыс тілінде сөйлейді деп ойлаймын. Бұл – біздің күшіміз. Әрине, мемлекеттік тіліміз – қазақ тілі, оның рөлі күн сайын артып келеді. Бірақ барлығымыздың орыс тілін білуіміз – тағы бір үлкен артықшылығымыз", – деді дипломат.
Абаевтың сөзінше, еліміздегі 7 мың мектептің шамамен 3 мыңы орыс тілінде білім береді. Сонымен бірге барлық оқу орындарында орыс тілі міндетті пән ретінде оқытылады.
"Орыс тілі біз үшін халықаралық бәсекеге қабілеттілікті арттыратын құрал", – деді елші.
